१८ जुन काठमाडौं ,
नेपालमा राष्ट्रपतीको ब्यापक छलफल चली रहेको बेलामा आज सञ्चारिका समूहद्वारा 'गणतन्त्र नेपालको पहिलो राष्ट्राध्यक्षमा महिला'  विषयमा  एक कार्यक्रमको आयोजना गरेको छ । उक्त कार्यक्रममा  बक्ताहरुले  नेपालको पहिलो राष्ट्रपति महिलालाई  नै बनाउनु पर्ने तर्क अगाडि सारेका छन । 

कार्यक्रममा नेकपा -माओवादी)का जनार्दन शर्मा 'प्रभाकर'ले आफ्नो पार्टीले महिलाहरूलाई ४० प्रतिशत सहभागी गराएको र भविष्यमा ५० प्रतिशतसम्म पुर्‍याउन तयार रहेको बताउनुभयो ।साथै उहाँले पछि परेका जाति, लिङ्गबाट राष्ट्रपति हुनुपर्ने मान्यता अनुसार रामराजाप्रसाद सिंहलाई र महिलाको तर्फबाट सहना प्रधानलाई प्रस्ताव गरेको बताउनुभयो ।

डा. सुरेन्द्र केसीले राजनीतिक योगदान, पारिवारिक पृष्ठभूमि र योग्यताको सवालमा सहना प्रधान नै राष्ट्रपतिको लागि उपयुक्त व्यक्तित्व भएको धारणा व्यक्त गर्नुभयो । नेकपा -एमाले)की रामुकमारी झाँक्रीले नेपालमा पहिलो राष्ट्रपति सहना प्रधान नै हुनुपर्ने र व्यक्तित्वको हिसाबले उहाँलाई कसैसँग तुलना गर्न उपयुक्त नहुने धारणा राख्नुभयो ।

युनिफेमकी अध्यक्ष सरु जोशीले महिलाहरूले विभिन्न क्षेत्रमा योगदान गर्दै आएको कुरालाई राजनीतिक पार्टीहरूले सकारात्मक विश्लेषण गर्दै राष्ट्रपतिको लागि महिलालाई प्रस्ताव गर्नुपर्ने र राष्ट्रपति मात्र नभई अन्य पदमा पनि महिलाहरूले अवसर पाउनुपर्ने आफूहरूको माग रहेको बताउनुभयो । नेपाली काङ्ग्रेसका सुनिल भण्डारीले महिलालाई राष्ट्रपति बनाउने हो भने पहिला महिला उत्थानको लागि विभिन्न कार्यक्रमहरू गर्नुपर्ने सल्लाह दिनुभयो ।