३ जुलाई २००८ काठमाडौं ।  मधेशवादी दलको माग सम्बोधन गर्न संविधान संशोधनका लागि पूरक प्रस्तावको ड्राफ्ट तयार गर्नेबारे दलहरु निष्कर्षमा पुग्न सकेनन् । १८ असारमा तीन दलका शिर्ष नेताबीच बालुवाटारमा बैठक भएपनि एमाले र माओवादीको नेपाली कांग्रेससंग कुरा मिल्न सकेन ।

माओवादी र एमालेले मधेश अनेक प्रदेशको प्रस्तावमा सहमति जनाउन सकिने तर एक मधेश एक प्रदेशलाई संशोधन प्रस्तावमा समावेश गर्न नसकिने अडान प्रस्तुत गरे । कांग्रेस मधेशवादीको मागलाई विगतमा भएको सम्झौताअनुसार संविधान संशोधनमा ल्याउन सकारात्मक देखियो । तीन दल आ आफ्नो अडानबाट डेग नचलेपछि प्रस्ताव लगी मतदानबाट टुंगो लगाउने दिशामा बढेका छन् ।

स्रोतका अनुसार प्रधानमन्त्री गिरिजाप्रसाद कोइरालाले मधेशवादीलाई मान्य हुनेगरी सहमतिमा जाने बताए । उनले सबैलाई सहमतिमा ल्याएर अगाडि बढ्नुपर्ने भन्दै बीचको बाटो खोज्नुपर्नेमा जोड दिए । उनले मधेशसंग विगतमा भएको सम्झौता पूरा गर्न आफू तत्पर रहेको बताएका थिए ।

बैठकमा नेपाली कांग्रेसका सभापति एवं प्रधानमन्त्री गिरिजाप्रसाद कोइराला, माओवादी अध्यक्ष प्रचण्ड र नेकपा एमालेका महासचिव झलनाथ खनाललगायत तीन दलका प्रभावशाली नेता सहभागी थिए ।

भोलि सहमतिको अन्तिम प्रयास गर्ने र त्यसमा सफलता हात नलागे मतदान प्रक्रियामा जाने बुझिएको छ । यता मधेशवादी दलले आफूहरुको माग पूरा नभए संविधानसभा बैठक चल्न नदिने बताउदै आएका छन् ।