६ जुलाई २००८ काठमाडौं ।  बिधायिका संसदमा मधेसवादी दलहरुले अवरोध फुकाउने उपाय पत्ता लगाउन प्रमुख तीन दल र मधेसवादी दलहरुबीच संयुक्त छलफल हुने भएको छ । असार २२ गते सिंहदरवारस्थित एमाले संसदीय दलको कार्यलयमा भएको माओवादी, नेपाली कांग्रेस र एमाले नेताहरुको छलफलले २२ गते दिउँसो २ बजे संयुक्त छलफल गर्ने निर्णय गरेको हो ।

आधा घण्टा लामो तीन दलको छलफलपछि त्यहाँ उपस्थित संचारकर्मीसँग कुरा गर्दै माओवादी अध्यक्ष पुष्पकमल दाहाल प्रचण्डले भने 'एक अर्काको धारणा बुझ्न छलफल गर्ने निर्णय गरेका हौं, यति नजिक भएर पनि एक अर्काको धारणा नबुझेको महशुस भएर यो छलफल आयोजना गर्न लागिएको हो ।' 

असार २० गते सत्तारुढ सात दलीय गठवन्धनको सहमतिपछि पनि मधेसवादी दलहरुले संसद अवरुद्ध बनाउन नछाडेपछि तीन दलले संसद नियमित बनाउने नयाँ पहल थालेका हुन् । तीन दलको छलफलमा माओवादी अध्यक्ष प्रचण्ड, एमाले महासचिव झलनाथ खनाल र नेपाली कांग्रेसका उपसभापति रामचन्द्र पौडेललगायत नेता सहभागि थिए ।